今代Samsung Galaxy S24系列賣點係AI功能，日前小編率先試玩真機，發覺無論通話、錄音或執相功能在AI參與後，用落都有大幅進步，而且對工作甚有幫助，即睇！
秒速語音翻譯
全新通話助手Call Assist具有即時翻譯Live Translate功能，毋需第三方應用程式，只要揀選翻譯語言，係通話中正常對話，對方就即時聽到語音翻譯，仲可選擇以男或女聲讀出。同時，即時通話內容會被翻譯並以文字形式在分屏模式下顯示，最正是全程以AI運算，唔使連住網絡都做得到。
示範用英語跟韓國人傾計，己方英語會即時翻譯為韓語讓對方聽到，對方韓語亦會即時翻譯為英語，每次運算過程只需1至2秒，神速得來準繩度亦高。這功能暫時支援英、日、韓、國語等常用語言，並將於本內年支援廣東話，日後去旅行就唔怕雞同鴨講啦！
▲示範跟韓國人講電話，英語會即時譯為韓語畀對方聽，而對方韓語又會即會譯為英語
長文生成摘要
不少工種好似記者、作家等需要經常寫作，以下兩個功能就啱晒佢哋。第一個是筆記助手Note Assist，它可以把一大段文字透過AI自動生成摘要，讓用戶更快了解當中的重點，甚至可根據文件內容生成相對應的封面，例如與食物有關，便生成食物圖案作封面。
▲一個掣就可把長文變成重點摘要
寫作風格建議
另一個有用功能是寫作助手Writing Assist，它可把根據用戶所撰寫的文字內容，經AI提供拼寫及語法修改建議，並即時模擬不同寫作風格建議，包括正式、輕鬆、社交媒體等風格，只需挑選所需風格就能即時修改文字內容。
▲實時把口語化文章，變成不同寫作風格
超強轉錄助手
轉錄助手Transcript Assist則是強化版錄音機，用咗佢秘書可慳番唔少功夫，事關佢可以一邊錄音一邊生成文字內容，最癲是AI能夠分辨不同發言者，再將語音轉變成文字作紀錄，得出精準的會議內容紀錄。功能支援翻譯，會議結束後仲會生成會議摘要，讓用戶即時得出會議重點內容。
▲可把整個會議記錄變成文字版，再生成會議摘要，慳番唔少整理功夫
畫圓即時搵料
S24嘅AI功能用係相片都得，佢係史上首款配備Circle to Search with Google功能嘅手機，用戶只需長按Home鍵就能開啟，之後一圈屏幕上的內容，系列自會幫你搜尋相關資訊。這功能無論開住相機，或睇住YouTube都用得，例如睇MV時圈一圈明星樣，就知佢係邊個，好鬼神奇！
▲新功能在影相介面都用得，圈一圈物件，就會經Google搵出相關資料
▲睇YouTube時畫圓連明星資料都搵到，證明人樣都認到！
自動相片補地
相片助手Photo Assist則是執相功能，利用AI來填補背景畫面，譬如當照片傾斜時，AI會自動填滿畫面邊界；而當相片中物件移動至其他位置，它就會自動填滿原始位置，並生成與背景銜接得到的內容。
▲自然填滿原始位置，並生成與背景銜接得到的內容
總結：誠意之作
Galaxy S24系列的AI功能還有很多，奈何測試時間有限，不過短短過程中已感受所謂AI功能不是俱俱綽頭，而是豐富又適合日常生活使用，由此可見今次廠方升級比上代更有誠意！
コメント