6月3日

小米Redmi Pad Pro測試睇片工作高性價之選

平板電腦雖然不及手機普及，但睇戲或辦公用大芒始終更好，所以一直有其市場。小米新機Redmi Pad Pro就以此為賣點，今次同大家測試！

新坐擁12.1吋16:10寬高比屏幕，提供2,560 x 1,600解像度、120Hz刷新率及1,500:1對比度。實試用來睇片又大又清晰，而且可視角度幾高，從側邊都睇到內容，好適合一班朋友圍埋睇片。畫質以外，佢兩邊搭共搭載4個立體聲喇叭，支援Dolby Atmos技術，睇戲時聲音從左右兩側平均輸出，沒有偏埋一邊，而且聲浪十足，建議收細幾格音量以免嘈親隔離。屏幕另一優點是取得TÜV萊茵認證低藍光、無閃爍及節律友好認證，保護用戶雙眼。美中不足是標準亮度及峰值亮度只有500nits及600nits，陽光底下有機會睇得唔清楚！

12.1吋屏幕夠晒大，16:10寬高比用來睇片剛剛好

屏幕可視角度高，側面照睇得清楚

兩側各設兩組喇叭，聲音唔會偏埋一邊

屏幕支援120Hz AdaptiveSync技術，可手動升降刷新率

Redmi Pad Pro預載Xiaomi HyperOS，支援多重視窗同時顯示。內置Snapdragon 7s Gen 2 處理器，《AnTuTu》測試跑出52萬分左右，表現屬中階機水平。惟留意它只備有8GB RAM及256GB儲存空間，長遠可能不夠用。其他配套還包括800萬像素後置鏡頭、800萬像素前置鏡頭及10,000mAh電池，並支援33W快速充電。

支援多個視窗同時顯示，方使一邊工作一邊娛樂

配備800萬像素後置鏡頭連補光燈

辦公方面，此機是首款支援Redmi Pad Pro鍵盤保護套和Redmi靈感觸控筆的Redmi平板電腦。靈感觸控筆具備4,096級壓力感應和240Hz的採樣率，實測書寫如真筆，沒有拖筆問題，筆桿粗幼亦適中，長揸沒有不適，而且單次充電可用長達12小時，毋須成日煩充電。鍵盤保護套則把平板變成電腦，擁有1.3mm鍵程和19mm鍵間距，同時配有Redmi靈感觸控筆筆座。測試所見，打字觸感當然不及真正鍵盤，鍵帽甚至有點硬，長期打字的話未免辛苦，但用來簡單作文書處理，它絕對夠用有餘。