新款PlayStation 5 Slim聽日(2023年12月20日)就係香港正式開售，在體積大幅減磅兼價錢唔變下，好多人都打算買來做聖誕禮物(女友們識做啦！) 小編就提早一日借到香港版行貨，即刻同大家開箱，睇吓買唔買得過！
▲新款PS5將於2023年12月20日於香港推出，光碟機版賣HK3,780，數位版賣HK2,980
官方唔係咁叫﹖
首先要說明一點，雖然坊間一直叫呢部機做「PS5 Slim」，但其實官方只叫它做「精巧型PS5」，由官網到包裝盒都完全沒有「PS5 Slim」字樣，只是既然已約定俗成，以下就叫新機做PS5 Slim啦！從包裝盒所見，新機真係Slim咗好多，盒面改印上上新機相片，而由於細部咗，所以機頂手挽都無埋，買回家時想方便啲，就要麻煩店員幫忙捆一捆繩了。
▲PS Slim(右）包裝盒比舊版(左）細好多，拎番屋企更方便
▲雖然盒背版面設計不同，但都是以主機機能為賣點
▲PS Slim(下）包裝盒沒有了舊版(上）的手挽，但始終輕咗好多，攬返屋企都無咁辛苦
▲盒面寫明SSD空間升級至1TB，而非舊版的825GB
多送兩隻腳仔
今次受測的是配備Ultra HD Blu-ray光碟機的機型，版本編號CFI-2018 A01，若是數位版編號則是CFI-2018 B01，因此新版又統稱叫「2000型」(舊版叫「1000型」)。拆開包裝，有主機一台，隨附DualSense無線手掣x1、電源線x1、USB連接線x1、HDMI連接線x1及已安裝到主機內的光碟機，以及多送2粒水平式支架腳座。
▲包裝內主機及配件一覽
更輕更靚仔
睇番官方數字，PS5 Slim尺寸約358×96×216mm，體積較舊版本細了30％，而3.2kg重量更較2020年第一版本輕了1.3kg，所以一拎上手就感到輕咗許多。拍埋兩代比較，PS5 Slim矮咗唔少，面板由左右兩塊變成左右四塊，上方是亮面、下方是原來霧面，大玩Mix & Match，比以前靚仔！
▲PS Slim(右）比舊版(左）短好多，不過寬度就唔爭好遠
▲面板由舊版(左)的一體成型，變成新版(右)的分拆處理，頂部亮面，底部沿用霧面設計
▲另一邊的面板設計亦一樣
貼心無障礙插頭
介面方面，舊版提供USB-A及USB-C插頭各一，PS5 Slim就變成兩個USB-C插頭；機背則保留兩個USB-A插頭，另有Lan Port及電源插頭各一，而HDMI插頭則移至中間位置，在看不到機背的情況下拔插會更就手。另外值得一提今代機背每個插口旁都增加了「△◯X▢」凸起標示，讓人一摸就知大概位置，設計對無障礙玩家無疑更貼心。
▲機面提供兩個USB-C插頭，原來的USB-A被抽走
▲機背介面大致相同，只是HDMI介面移到了中間
橫直瞓都得
跟舊版一樣，PS5 Slim都可打橫或打直擺，打橫擺的話要借助跟盒的「水平式支架腳座」，把這兩個透明膠腳仔壓入腰身中間凹槽，主機就可橫瞓而唔會「搖來搖去」。至於直擺，由於機身本來就上窄下闊，所以就咁直放已經夠穩陣，不過廠方同期出埋全新直立架，把它放於機底再轉動螺絲就安裝完成，想企得更定建議買埋啦！
▲腰身中間有凹槽，把這兩個透明膠腳仔壓入就得
▲安裝後主機就可瞓底，相當穩陣
▲與所有PS5機型相容的新直立架將另行販售，建議零售價為HK$238
▲新直立架用螺絲跟機底扣實，唔睇說明書都裝到
▲安裝後的樣子，唔單止企得更穩，亮面銀設計仲好高貴！
單手就可裝拆光碟機
除咗大幅瘦身，PS5 Slim另一特色是光碟機可以裝拆。原先小編都以為好難，但原來面板稍微用力就拆到出來，之後再把光碟機往下壓就可整個抽出，用同一方法就可裝回，容易到單手就做到(請睇片)！拆走後機身變得更輕，不過就要蓋回同一塊下半部面板，外型無變。若跟多一塊數碼版的下半部面板，唔要光碟機時就更慳位了！
▲拆開面板，可見上半部是風扇，下半部是光碟機所在
▲每塊面板背後都有卡榫，稍微用力就可拆出，裝回亦要對準才「啪」得落
▲有片為證，光碟機用單手就裝到，超Easy！
▲另外值得一提今代直接把退碟掣(箭咀)放到光碟機上，而非如上代放在電源掣旁
▲留意光碟機要先更新系統，兼且上網登錄後先用到
性能聲浪不變
PS5 Slim內置x86-64-AMD Ryzen Zen 2處理器、AMD Radeon RDNA 2架構圖形引擎、16GB RAM，整體性能不變，但SSD容量就加大至1TB，較825GB的舊版可裝多一至兩隻3A巨作。最後試埋讀碟速度及聲浪。以《Spiderman 2》為例，用P5 Slim入Game約13秒48，跟舊版接近，聲浪則集中於機背上方風扇位置，約有39dBA，也跟舊版相約。
▲「系統」顯示實際儲存空間為848GB，比上代更多位用
▲入《Spiderman 2》需時13秒左右，跟舊版大致相約
▲之前有人擔憂機身變細，將令聲音更集中更吵耳，實際證明跟舊版相約
總結：很難再說不了！
雖然PS5 Slim機能不變，但Size細部咗，外型又靚仔咗，單憑呢兩點已是入手理由。最重要是今次唔使抽籤鬥運先有機，而係明天就有大貨到，對於之前從未入手的玩家來說，今次無疑再沒有理由說不。唯一要考慮是市傳機能更強勁的PS5 Pro將於明年上市，但始終是傳聞，所謂早買早享受，聖誕假前想打機一於買咗PS5 Slim先啦！
Comments